Билим амалиёт билан уйғунлашгандагина ҳақиқий самара беради. Бугун тупроқни пластик ифлосланишдан муҳофаза қилиш борасидаги саъй-ҳаракатлар ҳам ана шу ҳақиқатнинг амалий ифодасидир.
Қишлоқ хўжалиги вазири, академик Иброҳим Абдураҳмонов барча қишлоқ хўжалиги ер эгаларини дала маданиятига қатъий риоя қилишга, пластик чиқиндиларни ўз вақтида йиғиштиришга ва экин майдонларини доимо озода сақлашга чорламоқда.
Пластик чиқиндилар — замонавий экологик таҳдид
Бугун пластик маҳсулотлар ҳаётимизнинг деярли барча соҳаларида кенг қўлланилмоқда. Бу эса атроф-муҳитда, жумладан тупроқ қатламида пластик чиқиндилар ва микропластикларнинг тўпланишига сабаб бўлмоқда.
Тупроқ муҳитидаги микропластик ифлосланиш бугунги кунда долзарб экологик муаммолардан бирига айланган. Бу йўналишда илмий тадқиқотлар ҳам изчил олиб борилмоқда.



